पर्सा । समयमा वर्षा नभएपछि देशका विभिन्न भूभागका किसानहरू चिन्तित भएका छन् । यसअघिका वर्षहरूमा असार १५ सम्ममा रोपाइँ सम्पन्न भइसक्ने खेतहरू यस वर्ष पानीअभावका कारण बाँझै छन् ।
रोपाइँ गर्न पुग्नेगरी वर्षा नभएपछि सुदूरपश्चिम प्रदेशका अधिकांश किसानले असार १५ गतेसम्म पनि रोपाइँ गर्न पाएका छैनन् । सिँचाइ सुविधा उपलब्ध भएका कतिपय किसानले भने रोपाइँ गरिरहेका छन् ।
धनगढीमा शनिबार खेत जोत्दै गरेको भेटिका चौधरीले कतिपय गाउँ बस्तीमा बोरिङ र हेण्डपम्पबाट पानी आउन बन्द भएको घटना गाउँमा पहिलोपटक अनुभव भएको बताए ।
पर्याप्त वर्षा नभएपछि असार १५ सम्म प्रदेशमा ४० प्रतिशत जग्गामा मात्रै रोपाइँ भएको कृषि निर्देशनालय दिपायलले जनाएको छ । प्रदेशको झण्डै ४४ प्रतिशत जग्गामा आकासे पानीको भरमा रोपाइँ गर्नुपर्ने अवस्था छ । सतह सिँचाइ र भूमिगत पानीको सिँचाइसमेत गरी प्रदेशभरि ५६ प्रतिशत जग्गामा सिँचाइ सुविधा पुगेको जनाइएको छ ।
निर्देशनालयका निमित्त प्रमुख नरेन्द्र पनेरुले पर्याप्त वर्षा नहुँदा यस वर्ष असार १५ सम्म ४० प्रतिशत जग्गामा रोपाइँ भएको जानकारी दिए । उनका अनुसार गत वर्ष असार १५ सम्म ८० प्रतिशत जग्गामा रोपाइँ सकिएको थियो ।
प्रदेशमा एक लाख ७४ हजार पाँच सय ५६ हेक्टर क्षेत्रफलको जग्गामा धान रोपाइँ हुन्छ । जिल्लागत रूपमा सबैभन्दा बढी कैलाली जिल्लामा ७१ हजार सात सय हेक्टर र कञ्चनपुरमा ४७ हजार पाँच सय हेक्टर जग्गामा रोपाइँ हुन्छ ।
केही दिनदेखि मनसुन सक्रिय रहे पनि आजसम्म कैलाली र कञ्चनपुरसहितका जिल्लामा ठूलो वर्षा हुनसकेको छैन ।
